ЗГ:Гадаадын хөрөнгө оруулагчдын эрх ашгийг хамгаалах ажлын хэсгийг байгуулахаар боллоо

Засгийн газрын ээлжит хуралдаан болж байна. Хуралдаанаар Ерөнхий сайд Л.Оюун-Эрдэнэ гадаадын хөрөнгө оруулагчдын эрх ашгийг хамгаалах ажлын хэсгийг байгуулах чиглэлийг өглөө. Тус ажлын хэсгийг ХЗДХ-ийн сайд Х.Нямбаатар ахлах бол гишүүдээр нь ГХ-ны сайд Б.Батцэцэг,  ЗГХЭГ-ын дэд дарга Б.Солонгоо нар ажиллана.

Ерөнхий сайд Л.Оюун-Эрдэнэ  (2021.08.17) гадаадын хөрөнгө оруулагчид, хөрөнгө оруулагч олон улсын байгууллагын төлөөлөгчидтэй уулзах үеэр хөрөнгө оруулагчдаас уучлалт гуйж байсан юм.

Тэрбээр "Өнгөрсөн 30 жилийн хугацаанд хөрөнгө оруулагч нартай холбоотой болон тодорхойгүй байсан бүх асуудал дээр Монгол Улсын үе үеийн Засгийн газрыг төлөөлж уучлалт гуйж байна. Ерөнхий сайдын хувьд өөрөөс шалтгаалах бүх зүйлийг дайчлан, улс орныхоо эдийн засгийг сэргээх тал дээр анхаарч ажиллана. Асуудалд тулга тойрсон байдлаар бус, алсыг харсан төлөвлөгөөтэй хандаж ажиллах болно" хэмээн хэлж байсан. Энэ хүрээнд өнөөдөр Засгийн газрын хуралдаанаар гадаадын хөрөнгө оруулагчдын эрх ашгийг хамгаалах ажлын хэсгийг байгуулах чиглэлийг өглөө.