Төрийн ордонд Шадар сайд, Ерөнхий сайд шатахуун импортлогчидтой яг одоо хаалттай хуралдаж байна.
Шатахууны нөөцийг бүрдүүлж, хэвийн нөхцөлд оруулахад хоёр гарц байна гэдгийг хуралдааны үеэр талууд хөнджээ. Нэгдүгээрт, манай улсаас ОХУ-руу өнөө өглөө явсан төлөөллүүд Роснефттэй тохирох буюу тохиролцсон 40 хувиа нийлүүлээч гэдгийг ярих юм байна. Тодруулбал, ОХУ-ын тал манайхтай хийсэн гэрээгээр хамгийн багадаа 28 мянган тонн АИ-92 нийлүүлнэ гэж тохирсон байдаг ч бууруулж, 17 мянган тонн АИ-92 өгөхөө энэ сарын эхээр манай талд мэдэгджээ. Гэвч одоогоор үүнээс 7 мянган тонн АИ-92 орж иржээ.
Хоёр дахь яригдаж буй гарцын тухайд БНХАУ-ын талаас 1037 вагон АИ-92 авахаар тохирсон ч төмөр замын тээвэрлэлттэй холбоотойгоор гацаад буй. Үүнийг даруй татаж авах асуудлыг ярьж байна. Уг 1037 вагон Хөх хотод байгаа бөгөөд эхний ээлжид 200 вагон АИ-92 шатахуун татаж авбал тасалдал үүсэхгүй гэж албаныхан хэлжээ.
Одоогоор манай улс 6 мянган тонн АИ-92 шатахууны нөөцтэй, энэ нь долоо хоногийн хэрэглээ юм.
Сэтгэгдэл (0)
Сэтгэгдэл бичигдээгүй байна