Хан Хэнтийн дархан цаазат газраас самар түүвэл нэг кг самар тутамд 150 мянган төгрөгөөр торгоно

Энэ жил дөрвөн аймгийн есөн суманд самар түүхийг зөвшөөрсөн. Өвөрхангай аймгийн Бат-Өлзий, Сэлэнгэ аймгийн Хүдэр, Ерөө, Мандал, Төв аймгийн Батсүмбэр, Эрдэнэ, Мөнгөнморьт, Хэнтий аймгийн Өмнөдэлгэр, Батширээт сумдад "Ойн судалгаа хөгжлийн төв"-өөс хийсэн судалгаанд үндэслэн нийт 14 мянган тонн самар түүх зөвшөөрөл олгоно.

Урьдчилсан тооцооллоор,

• Үйлдвэрлэлийн зориулалтаар 8000
• Ахуйн зориулалтаар 6000 тонн самар бэлтгэх зөвшөөрөл олгоно гэж тогтоосон. 

Энэ хүрээнд Хан Хэнтийн дархан цаазат газар хуш модны самар түүхийг хориглосон шийдвэрийг Хан Хэнтийн улсын тусгай хамгаалалттай газраас гаргажээ. 

Энэ талаар тус газрын дарга Б.Хашмаргадтай ярилцлаа. Тэрбээр "Энэ жил самрын их ургацын жил биш учраас Хан Хэнтийн дархан цаазат газар ахуйн болон үйлдвэрлэлийн зориулалтаар хуш модны самар түүхийг хориглож байна. 

Жил бүр Хан Хэнтийн дархан цаазат газар руу нэвтэрдэг гол замуудад жилийн турш 24 цагийн хамгаалалт гардаг. Хэрэв Хан Хэнтийн дархан цаазат газар руу самар түүхээр нэвтрэхийг завдсан мөн хууль бус самар түүсэн тохиолдолд Зөрчлийн тухай хуулиар торгох хуулийн зохицуулалтай. Тодруулбал, хууль бус самар түүсэн нь тогтоогдвол нэг кг самар тутамд 150 мянган төгрөгийн нөхөн төлбөр оногдуулах хуулийн заалттай" гэлээ.