ТЕГ-ын хэлтсийн дарга асан, хурандаа Д.Давааням Өршөөлийн хуульд хамрагджээ

Тагнуулын ерөнхий газрын хэлтсийн дарга, хурандаа Д.Давааням, хурандаа Ж.Төгс-Очир 2020 оны гуравдугаар сарын 18-нд буюу Монгол цэргийн баярын өдөр Сүхбаатар дүүргийн Татварын хэлтсийн тасгийн дарга Ч.Ганбаатарыг зодож, тархинд нь хүнд гэмтэл учруулсан хэргийг "Зариг" сайт анх удаа олон нийтэд мэдээлж мөн гэрчээр мэдүүлэг өгч байсан билээ. 

Уг үйл явдал Хан-Уул дүүргийн нутаг дэвсгэр “Энканто Булл” рестораны нэгэн өрөөнд болсон байдаг. Тэдний зодолдож буй бичлэг олон нийтэд цацагдсаны дараа хурандаа нарыг ажлаас нь чөлөөлсөн. Дээрх хэргийг Баянзүрх дүүргийн Цагдаагийн газар шалгаж, тус дүүргийн Прокурорын газраас Д.Даваанямд  Эрүүгийн хуулийн 11.6.1дахь хэсэгт зааснаар "Хүний эрүүл мэндэд хөнгөн хохирол санаатай учруулсан" гэх үндэслэлээр яллах дүгнэлт үйлдэн дүүргийнхээ Эрүүгийн хэргийн анхны шатны шүүхэд шилжүүлсэн  байдаг. Улмаар шүүхээс Д.Даваанямыг гэм буруутай гэж үзсэн ч тэрбээр Өршөөлийн хуульд хамрагдаж, биечлэн эдлэх ялаас чөлөөлөгджээ. 

Өршөөлийн шинэ хууль энэ оны долдугаар сарын 6-ны өдрөөс хүчин төгөлдөр үйлчилсэн.