Хоёр жилийн өмнө Монгол Улсад ковидын анхны тохиолдол бүртгэгдэж, өндөржүүлсэн бэлэн байдал зарласан. Өндөржүүлсэн бэлэн байдлын үед Төрийн ордонд иргэд, сэтгүүлчид хэрхэн орж нэвтэрч, яаж ажиллахыг зохицуулахаар түр журам гаргасан. Энэ хугацаанд сэтгүүлчид Төрийн ордон руу орох боломжгүй, өнөөдрийг хүртэл хөл хорионд байгаа юм.Үүнийг сэтгүүлчид эсэргүүцэж, акц зохион байгуллаа.
Улстөрч, УИХ-ын гишүүд өөрсдийн захиалсан дуугаа захиалж байгаагийн нэг илрэл нь парламентын сэтгүүлчид Төрийн ордонд чөлөөтэй нэвтэрч, иргэдийн мэдэх эрхийн хүрээнд ажиллах боломжгүй болсон явдлаас харагдаж байна хэмээн сэтгүүлчид акц хийлээ. Парламентын сэтгүүлчид ажлын үнэмлэхээ гинжилж уг акцыг хийж байгаа нь хэвлэлийн эрх чөлөөг үүн лугаа гинжилж буйн илрэл хэмээн харуулж байгаа юм.
Улмаар Парламентын сэтгүүлчид нэгдээд УИХ-ын Тамгын газар, Засгийн газар, Ерөнхийлөгчийн тамгын газарт шаардлага хүргүүллээ.
Засгийн газрын Хэвлэл мэдээлэлтэй харилцах газрын дарга Т.Ганзул: УИХ-ын даргын баталсан түр журмаар зохицуулалт хийгээд явж байгаа. Энэ журам хоёр жил хэрэгжсэн гэдгийг бид бүхэн маш сайн ойлгож байгаа. Та бүхний төлөөлөлтэй бид өмнө нь хоёр ч удаа уулзсан учраас ямар асуудал байгааг тодорхой ойлгож байгаа. Энэ журмыг хэрхэн өөрчилж болох вэ гэдэг асуудлаар бид бүхэн дотооддоо хэд хэдэн удаа хуралдсан. УИХ-ын тамгын газрын, Ерөнхийлөгчийн тамгын газар, ЗГХЭГ-аас гадна энэхүү журамд Төрийн тусгай албаныхан бас оролцдог. Холбогдох албан тушаалтнуудад шаардлагыг өгөөд, аль болох хурдан хариу мэдээлэл хүргэнэ.
УИХ-ын тамгын газрын Хэвлэл мэдээлэл олон нийттэй харилцах хэлтсийн дарга С.Батбаатар: Хоёр жилийн хугацаанд сэтгүүлчид Төрийн ордон руу орох боломжгүй, тодорхой хязгаартай байсанд хэвлэлийн асуудал хариуцаж байгаа миний хувьд ч сэтгэл зовниж байгаа. Тиймээс аравдугаар сарын 1-нд эхлэх гэж байгаа намрын ээлжит чуулганаас өмнө нь энэ асуудлыг хэрхэн зохицуулах вэ гэдгийг сүүлийн 20-иод хоног ярьж байна. Түр журмаа өөрчлөх бодолтой байгаа. УИХ-ын даргад энэ асуудлыг тавина. Татгалзахгүй байх гэж бодож байна. Гэхдээ ковидын нөхцөл байдал хүнд байгаа учраас хүн хоорондын зай барих шаардлагатай болно.
Сэтгэгдэл (0)
Сэтгэгдэл бичигдээгүй байна