Ардчилсан нам "Одоо боллоо" уриатай жагсаалыг аравдугаар сарын 1-ний өдөр Сүхбаатарын талбайд зохион байгуулах талаараа мэдэгдсэн. Уг жагсаалд иргэд олон нийтийг оролцож, үзэл бодлоо илэрхийлэхийг уриалсан. Үндсэн дөрвөн шаардлагын хүрээнд тус жагсаалыг зохион байгуулах аж.
Тэгвэл өнөөдөр Засгийн газрын хуралдаан дээр Ерөнхий сайд Л.Оюун-Эрдэнэ энэ талаар хөндөж, тэрбээр "Монгол хүн Үндсэн хуулийнхаа дагуу тайван жагсаал хийж, үг хэлж үзэл бодлоо илэрхийлэх эрхтэй. Энэ эрхийг нь хүндэтгэж ханд. Төр засагтаа үгээ хэлж, төрийн байгууллагаас тайлан нэхэх эрхтэй. Тэр хүмүүст буруу байхгүй. Харин жагсаал зохион байгуулж байгаа хүмүүс хариуцлагатай байх ёстой" гэдгийг хэлжээ. Тиймээс иргэдийн үг хэлэх эрхэд нь хүндэтгэлтэй хандах чиглэлийг ХЗДХ-ийн сайд Х.Нямбаатар болон УОК-д өгчээ.
УИХ-ын гишүүн Б.Пүрэвдорж Жагсаал зохион байгуулах тухай хүсэлтээ НОК-д албан ёсоор хүргүүлж, халдвар хамгааллын дэглэм баримтлан зохион байгуулахаа дурдсан байна.
Сэтгэгдэл (0)
Сэтгэгдэл бичигдээгүй байна