Оюутолгойн Төлөөлөн удирдах зөвлөл өнөөдөр /2021.09.29/ хуралдана. Уг хуралдааны талаар ХЗДХ-ийн сайд Х.Нямбаатараас тодруулахад тэрбээр "Оюутолгой” компанийн ТУЗ -ийн хуралд Монголын Засгийн газрын 34 хувийг төлөөлж З.Ган-Очир, Э.Баясгалан, Н.Багабанди нар оролцоно. Урьдчилсан мэдээллээр далд уурхайн бүтээн байгуулалтын ажлыг цаашид үргэлжлүүлэхэд шаардагдах зардлыг батална гэсэн" мэдээлэлтэй байна гэлээ.
Түүнчлэн Оюутолгойн гэрээний хэрэгжилтийг сайжруулах ажлын хэсэг долоо хоног бүр хуралддаг. Өнгөрсөн долоо хоногт нөөцийн тодотгосон тайланг Уул уурхай, хүнд үйлдвэрийн яамны Эрдэс баялгийн зөвлөл баталжээ. Энэ долоо хоногт хоёр талаас Оюутолгойн эрчим хүчний хангамжийн асуудлыг эцэслэхээр төлөвлөжээ. Хөрөнгө оруулалтын гэрээнд заасны дагуу Оюутолгой ордын нүүрсээр ажилладаг эрчим хүчний эх үүсвэрийг барьж байгуулах үүргээ хэрэгжүүлэхэд хоёр хувилбар яригдаж байгаа гэж ажлын хэсгийн ахлагч Х.Нямбаатар хэллээ. Түүнчлэн Оюутолгойн төсөлтэй холбоотой маргаан Лондонгийн арбитрын шүүхэд очсон. Татвартай холбоотой асуудлаар Монгол Улсыг хариуцагчаар татсан. Ирэх аравдугаар сард сөрөг нэхэмжлэлтэй холбогдуулан хариуцагчаар “Рио Тинто”-г татан оролцуулах эсэх талаар хурал болно.
Ажлын хэсгийн зүгээс өнгөрсөн наймдугаар сард “Рио Тинто” компанид “Наймдугаар сард гарсан далд уурхайн зардлын хэтрэлттэй холбоотой хөндлөнгийн шинжээчдийн дүгнэлтэд тайлбар өгөөч" гэдэг шаардлага тавьсан. Тус компаниас уржигдар тайлбар ирүүлсэн байна. Уг тайлбартай холбоотойгоор Засгийн газрын ажлын хэсэг дотооддоо хуралдаж холбогдох талаас тайлбар, мэдээлэл сонсоно гэлээ.
Сэтгэгдэл (0)
Сэтгэгдэл бичигдээгүй байна