УИХ-ын Эдийн засгийн байнгын хорооны өнөөдрийн /2021.10.06/-ны хуралдаанаар Хөрөнгө оруулалтын тухай хуульд өөрчлөлт оруулах тухай, Хуулийн этгээдийн Улсын бүртгэлийн тухай хуульд өөрчлөлт оруулах тухай хуулийн төслийг хэлэлцэхийг дэмжлээ. Одоо үйлчилж байгаа хуулиар гадаадын компани Монгол Улсад бизнес эхлэхийн тулд гадаадын хөрөнгө оруулалттай аж ахуйн нэгж эсвэл төлөөлөгчийн газар гэсэн статусын аль нэгийг сонгох хэрэгтэй болдог. Мөн гадаадын хөрөнгө оруулалттай аж ахуйн нэгжийн 25-аас доошгүй хувийг гадаадын компани эзэмшсэн байх ба 100 мянган ам.доллароос доошгүй хөрөнгө оруулалт хийсэн байх ёстой. Энэхүү хөрөнгийн босго нь гадаадын хөрөнгө оруулалттай аж ахуйн нэгж байгуулахад шаардлагагүй бөгөөд харин тухайн хөрөнгө оруулагч болон түүний гэр бүл нь Монгол Улсад байнга оршин суух виз хүсэх тохиолдолд Монгол Улсад оруулах хөрөнгө оруулалтын доод хэмжээг зааж өгөх нь тохиромжтой гэж хуулийн төсөл санаачлагч үзжээ.
Хэлэлцэж байгаа асуудалтай холбогдуулан гишүүд асуулт асууж, хариулт авлаа.
УИХ-ын гишүүн Ж.Бат-Эрдэнэ:
-Зөв хуулийн төслийг оруулж ирлээ. Энэ хуулийг зөвхөн цар тахалтай уялдуулж хязгаарламааргүй байна. байна. Зах зээл нь илүү хөгжиж, хуримтлал, хөрөнгө оруулалт бий болчихсон зах зээлийн туршлагатай гаднын орнууд бусад улс оронд хөрөнгө оруулалт хийдэг нь зах зээлийн ерөнхий зарчим. Зарим орон зах зээлээ хамгаалах асуудлаа орхигдуулчихдаг. Үүнээс болж хөрөнгө оруулагч нарыг үзэн яддаг, сүүлд нь хөөдөг. Энэ нь зах зээлаа алдахын шинж. Жишээ нь бидэнд арьс, шир ноос ноолуур, махны зах зээл байгаа атал махны зах зээлээ Хятад руу алдчихсан. Вьетнамчуудад машин засварын зах зээлээ алдлаа гэдэг. Тэгэхээр аливаа хууль боловсруулахдаа бодлогыг нь заавал оруулж ирдэг байх ёстой. Хэн нэгэн гишүүн эсвэл сайд тухайн дөрвөн жилдээ зохицуулах бус урт хугацаанд нь алдаа гаргахгүй байх төрийн бодлого нь хуульдаа тусгагдсан байх ёстой. Гаднын хөрөнгө оруулалт орж ирээд тухайн ААН нь хөл дээрээ боссоны дараа хамтарсан хөрөнгө оруулалт хийгээд тэр нь тодорхой хугацааны дараа 51 хувь нь Монголын талд шилждэг гэх мэт зах зээлээ хамгаалсан асуудал орхигдоод байна шүү. Манай бүх экспортын ард урд хөршийн хөрөнгө оруулагчид байгаа. Үүнийг яаж зохицуулах вэ. Цаашид бусад салбарын хөрөнгө оруулалтуудыг яаж хамгаалах вэ. Энэ асуудлыг Хөрөнгө оруулалтын тухай хуульд оруулсан уу. Татвар, хувь хувьцаатай холбоотой зах зээлийн хамгаалалтын заалтууд тусгагдсан уу.
Хуулийг санаачлагч УИХ-ын гишүүн Х.Ганхуяг:
-Гол хамгаалалт нь ажлын байр. Хэрэв зах зээлийг хамгаална гээд оруулбал өмнөх 100 мянган ам.долларын босготой адил зүйл болчих гээд байгаа юм. Өнөөдөр бид зах зээлээ хамгаалах уу эсвэл ажлын байраа хамгаалах уу гэвэл ажлын байрыг илүүд үзнэ.
УИХ-ын гишүүн Ж.Бат-Эрдэнэ: Хамгийн гол асуудал дээрээ мурийх гэж байна шүү Х.Ганхуяг гишүүн ээ. Бидний зах зээл шүү дээ. Ажлын байрыг бид өөрсөддөө олгоно. Энд байгаа аж ахуйн нэгжүүдээ хөл дээрээ босгох нь чухал байна.
УИХ-ын гишүүн Х.Булгантуяа: Хуулийн төсөлд гадаадын хөрөнгө оруулагч түүний гэр бүлд Монгол Улсад зорчих олон удаагийн орж гарах виз олгон гэж заасан. Үүнийг Монголд байнга оршин суух визийг гадны ямар ч хамаагүй хүнд олгох юм шиг ойлгож болохгүй.
Сэтгэгдэл (0)
Сэтгэгдэл бичигдээгүй байна