В, С ВИРУСЫН ШИНЖИЛГЭЭ АЙМГУУДААС ЭХЭЛЛЭЭ

Улс орон даяар хэрэгжиж байгаа "Элэг бүтэн Монгол" хөтөлбөрийн хүрээнд эхний ээлжинд 40-65 насны эрүүл мэндийн даатгалд хамрагдсан иргэдэд В, С вирусын шинжилгээг үнэ төлбөргүй хийхээр болсон.

Харъяа яамны мэдээлснээр шинжилгээнд хамрагдах иргэдийн бүртгэл дууссан бөгөөд Дорнод, Архангай, Дархан-Уул зэрэг аймгуудад шинжилгээ оношилгоог эхлүүлсэн байна.

Энэхүү хөтөлбөрийг хэрэгжүүлснээр элэгний өвчлөлийн талаар нарийвчилсан судалгаа гаргах мөн нэгдсэн бүртгэлтэй болгож эмчилгээ явуулахад хүндрэлгүй болсон гэдгийг албаны хүн онцолсон байна. Үүнээс гадна элэгний архаг өвчтэй, хатууралтай нь тогтоогдсон тохиолдолд хавдрыг эрт илрүүлэх үзлэгт орохын хамт эмэн эмчилгээ хийх шаардлагатай иргэдэд 5 төрлийн эмийг тус бүрт нь 210 мянган төгрөгийн хөнгөлөлттэй авах эрх үүсчээ.