МИК: Шадар сайдын мэдэгдэл гарснаас хойш манай компанийн үнэлэмж олон улсад буурлаа

Ипотекийн зээлийн хүү, шалгуур үзүүлэлтэд манай байгууллага оролцдоггүй гэж тус компанийн гүйцэтгэх захирал мэдэгдлээ.

Өнөөдрийн байдлаар иргэдэд олгож байгаа орон сууцны зургаан хувийн хүүтэй зээлийн 40 хувийн эх үүсвэрийг арилжааны банкууд гаргадаг байна. Одоогоор 98 мянган өрх 5 их наяд гаруй төгрөгийн зээлэнд хамрагдаад байна.

Тэгвэл зээл олгох проццест Монголын ипотекийн корпораци оролцдоггүй гэж мэдэгдлээ. Зээлийн хүү болоод шалгуур үзүүлэлтийг зээл олгож байгаа эрх бүхий байгууллагууд болох арилжааны банк, төв банкнаас тогтоодог гэж мэдэгдэж байна. Тус компанийн үүрэг оролцоо нь эх үүсвэрийн санхүүжилт, зээл олголт тасралтгүй явагдах процесст хяналт тавих үүрэгтэй гэлээ. 

МИК бол үнэт цаасны хоёрдогч зах зээлд үйл ажиллагаа явуулдаг мэргэшсэн санхүүгийн байгууллага юм. Монгол Улсын хүн амыг орон сууцаар хангах хөнгөлөлттэй хүүтэй ипотекийн зээлийн хөтөлбөрийг тасралтгүй хэрэгжүүлэхэд үнэт цаасны хоёрдогч зах зээлийн үйл ажиллагаагаар дэмжин оролцдог. Өөрөөр хэлбэл, арилжааны банкны бие даан олгосон ипотекийн зээлийг тухайн банкнаас багцлан худалдан авдаг. Дараа нь үүгээр ипотекийн зээлээр баталгаажсан бонд гаргадаг. Хөрөнгөөр баталгаажсан үнэт цаасны тухай хууль бий.

Ингэснээр энэ хөтөлбөр 2013 онд хэрэгжиж эхэлсэн цагаас тасралтгүй үргэлжлэх боломжийг бүрдүүлж, үр дүнд нь 90 мянга гаруй айл өрх өөрийн орон сууцтай болсон. Зээлийн хүү 5-8 хувь байна гэж мэдэгдлээ.