"Эрдэнэт" үйлдвэрийн 49 хувийн луйварт оролцсон эрхмүүд "Хөтөл"-ийн хувьчлалын зургийг танил аргаар зурсан нь:

Хөгжлийн банкнаас гарсан нийт зээлийн 3/2 буюу 508  тэрбум төгрөгийн зээл ХХБ-ны төлөөлөн удирдах зөвлөлийн дарга Д.Эрдэнэбилэгтэй холбогдож байгаа. Арван жилийн хугацаа өнгөрч байхад авсан зээлээ огт төлөөгүйн дээр зээлийг заавал хугацаанд нь төлөх албагүй гэх түүний үг олны эгдүүцлийг хүргэсэн. Элит хотхонд 3-4 өрөө байр авах үнээр бүхэл бүтэн үйлдвэр хувьчлаад авчихсан нь илтэд луйвар гэж засгийн газар үзсэнээр Монголын төр сахал Д.Эрдэнэбилэг  гэх потенциальны ганц хулгайчтай болжээ гэж олон нийт харахад хүргэсэн юм. Ердөө 1.3 тэрбум төгрөгөөр Хөтөл цемент шохойн үйлдвэрийг авсан түүхийг товчхон сөхье:

2012 онд Хөтөлийг хувьчилж авах төлөвлөгөө ажил болж эхэлжээ. Хөтөлийн цемент шохойн үйлдвэрийн нойтон аргын технологийг хуурай аргад шилжүүлэх хэрэгтэй гэж тухайн үеийн Барилга хот байгуулалтын сайд, өнөөгийн ерөнхийлөгч асан Х.Баттулга хөндөж байж. Улмаар ажлын хэсэг байгуулагдаж гадна дотны 10 орчим компанид хөрөнгө оруулалт хийж тендерт оролцох санал тавьсан байдаг. Үүний нэг нь өнөөх Д.Эрдэнэбилэг гэх хүний байгуулсан “Бэйсмент” ХХК. Дарханы төмөрлөгийн үйлдвэрийг авсан Кю Эс Си компани, Хөтөлийг авсан Бэйсмент гэх компаниуд 2008 оны 11 сард нэгэн зэрэг байгуулагдаж байсан цаасны компани хэмээн эх сурвалж хэлж байна. Хөтөл үйлдвэрт хуурай аргын технологи нэвтрүүлэн хөрөнгө оруулах компанийн сонгон шалгаруулалт нүд ирмэхийн зуур болж үндэсний хөрөнгө оруулагч гэх тодотголоор Бэйсмент компани шалгарсан байдаг. Тус компанийн 20 хувийг улсын дээд шүүхийн шүүгч Батсуурийн аав Мишиг гэдэг хүн эзэмшиж байсан нь төрийн мөнгөөр Эрдэнэт үйлдвэрийн 49 хувийг, хувьдаа авсан алдарт луйварт олон талаар оролцоотой эрхмүүд Хөтөл дээр ажилласан нь тодоор харагдаж байгаа юм. Хөтөлд хөрөнгө оруулалт хийх мөнгөгүй цаасан дээр шахуу байсан Бэйсмент компани шалгаруулалтад нэгээр гарч ирсэнээр Хөгжлийн банкийг тонон дээрэмдэх эхлэлт тавигдаж байсан гэхэд буруудахгүй. Хөгжлийн банкнаас тус компани зээл авахдаа хуурай аргын технологи нэвтрүүлнэ хэмээн зээл авсан байдаг.

2015 онд З. Энхболд даргатай УИХ тогтоол гаргаж Хөтөлийн үйлдвэрийг хөрөнгө оруулагчид нь хувьчилж өгнө хэмээн шийдсэн. Тухайн үед засгийн газрын тэргүүн Ч.Сайханбилэг байсан бол Төрийн өмчийн хорооны даргаар өнөөгийн ҮХЦ ийн гишүүн Ц.Нанзаддорж байсан. Монголын ганц саалийн үнээ гэгдэх Эрдэнэт үйлдвэрийн талыг авахтай ижил, ихэд танил технологи харагдаж гол дүрийн эзэд ч Хөтөлийн зургийг зурсан нь товч хэдхэн жишээгээр ийнхүү харагдаж байгаа юм.