Монгол гэр үйлдвэрлэгчийн өмнө тулгамдсан асуудлууд цөөнгүй байдаг. Өөрөөр хэлбэл түүхий эдийн ханган нийлүүлэлт хязгаарлагдмал байгаа нь эцсийн бүтээгдэхүүний үнэ өсөх шалтгаан болжээ. Монгол гэр, гэрийн иж бүрдэл үйлдвэрлэгчдийн холбоо өнөөдөр 60 гаруй аж ахуй нэгжийн 400-аад хүний бүрэлдэхүүнтэй үйл ажиллагаа явуулдаг байна. Тэд холбоогоороо дамжуулан хэрэглээний мод бэлтгэх зөвшөөрөл авах хүсэлтэй.
Бид салбар яамнаас хэрэглээний мод бэлтгэх зөвшөөрлийг хэнд хэрхэн олгодог талаар тодруулахад жил бүр ойн сангаас бэлтгэх хэрэглээний болон түлээний модны дээд хэмжээг аймаг нийслэлийн засаг даргын саналыг үндэслэн сайдын тушаалаар баталдаг. Мод бэлтгэх зөвшөөрлийг орон нутгийн иргэдийн хурлын төлөөлөгчдийн шийдвэрээр зөвхөн тухайн орон нутгийн иргэн , аж ахуй нэгж байгууллага, нөхөрлөлд нь хуваарилалт хийсний үндсэн дээр олгодог гэсэн юм. Харин зөвшөөрөл авсан иргэн аж ахуй нэгжийн тухайд бэлтгэсэн модоо түүхийгээр нь болон зүсэж бэлтгэсэн хэлбэрээр эсвэл эцсийн бүтээгдэхүүн болгон худалдах бүрэн эрхтэй юм байна.
Нэгэнт мод бэлтгэх зөвшөөрөл өөрөө хэмжээ хязгаартай. Мөн энэ зөвшөөрлийг орон нутгийн иргэн аж ахуй нэгжүүд олгодог учир Улаанбаатарт үйл ажиллагаа явуулдаг гэрийн мод үйлдвэрлэгчид хэрэглээний мод бэлтгэх зөвшөөрөл олдохгүй юм байна. Харин тэдэнд хямд эх үүсвэрээс буюу орон нутагт нь очин модоо худалдан авах эрх нь нээлттэй. Энэ тохиолдолд худалдан авсан модныхоо гарал үүслийн гэрчилгээг орон нутгийн ойн ангиас авч тээвэрлэн оруулж ирэх боломжтой гэлээ.
Өөрөөр хэлбэл мод бэлтгэх зөвшөөрөлтэй орон нутгийн аж ахуй нэгж, нөхөрлөлөөс бэлтгэсэн модыг нь газар дээрээс нь захын үнээс хямдаар авч болно. Гэвч тэдгээр аж ахуй нэгжүүд нь модны захын ченжүүдэд модоо нийлүүлэх тогтвортой байдлын гэрээ хийчихсэн байдаг тул гэрийн модны үйлдвэр эрхлэгчдэд модоо зардаггүй нэг зовлон байна. Энэ тохиолдолд төр зохицуулалт хийх эрх зүйн үндэс байдаггүй чөлөөт зах зээлийнхээ журмаар явна гэж салбарын яамнаас хариулсан юм.
“Заригийн дугтуй” сурвалжилга энэ удаад хэрэглээний мод бэлтгэх зөвшөөрлийн асуудлыг хөндлөө. Бизнес эрхлэгч иргэн аж ахуй нэгж таны үйл ажиллагаанд сөргөөр нөлөөлж буй төрийн шийдвэр хүнд суртлын талаар бидэнд хандах бүрэн боломжтой.
Сэтгэгдэл (0)
Сэтгэгдэл бичигдээгүй байна