Эрдэнэт үйлдвэрээс зарласан өндөр дүн бүхий тендер бүрт “Сод Монгол групп” ХХК ялдаг нь ашиг сонирхол байх магадлалтай

Уулын баяжуулах Эрдэнэт үйлдвэрээс зарлагдсан өндөр дүн бүхий тендер бүрт Сод Монгол групп ХХК ялдаг байна. Өнгөрсөн онд тус группын ерөнхийлөгч, УИХ-ын гишүүн Ц.Анандбазар иргэн С-ийг хүчирхийлэхээр завдсан гэх асуудал сөхөгдөх үед ганц л удаа тендерт ялагдаж байжээ. Тэгвэл Эрдэнэт үйлдвэрийн Ерөнхий захирал Х.Бадамсүрэнгийн Санхүү эдийн засаг хариуцсан орлогч захирал Д.Үүрийнтуяа нь 2014-2016 оны хооронд Сод Монгол групп ХХК-д ажиллаж байсан. 

Тендер шалгаруулах ажилд шууд оролцоотой тус дарга ашиг сонирхолоор ханддаг байж болзошгүй гэж олон нийт хардаж эхэллээ. Учир нь өнгөрсөн 4-р сард зарлагдсан Эрдэнэт үйлдвэрт зуны түлш нийлүүлэх тендерт Сод Монгол групп ХХК мөн л ялсан. Ингэхдээ хуурамч бичиг баримт үйлдсэн байж болзошгүй асуудал сангийн яаман дээр шалгагдаж эхлээд байгаа юм. Тус групп 38,4 тэрбум төгрөгийн дизель түлшийг нийлүүлэхээр тендерт шалгарсан ч илтэд бичиг баримтын зөрчилтэй байсан нь шүүмжлэл дагуулаад байгаа юм. ОХУ-аас нийлүүлэх дизель түлшний хүхрийн агууламж үйлдвэрийн албан ёсны сайт дээр өндөр байсан ч Эрдэнэт үйлдвэрт өгч тендерт шалгарсан материалд хүхрийн агууламжийг бууруулж бичсан нь анхаарал татаж Photoshop программаар зассан байх магадлалтай гэж хардахад хүргээд байна. Уг асуудлыг сангийн яам шалган нягталж шаардлагатай бол хуулийн байгууллагад шилжүүлэх юм. Харин нөгөө талаас үйлдвэрийн нөлөө бүхий албан тушаалтан тендерт ашиг сонирхлоор ханддаг бол эрүүгийн хэрэг болж хувирна. Энэ асуудлыг ч шалгах ёстой гэж зарим аж ахуй нэгжийн төлөөлөл үзэх болжээ.