Улсын хөгжилд чухал нөлөө үзүүлэх томоохон төслүүдийг санхүүжүүлэх зорилготой хөгжлийн банкнаас арилжааны томоохон банкууд зээл авсан. Тухайлбал Д.Баясгалан захиралтай Голомт банк Улаан буудайн нөөц бүрдүүлэх хөтөлбөр нэрээр 2 тэрбум төгрөг авсан бол “Сахал” хочтой Д.Эрдэнэбилэгийн Худалдаа хөгжлийн банк 7.1 тэрбум төгрөгийн зээлийг жил гарны өмнө авсан байдаг.
Харин Хаан банк мөн л улаан буудайн нөөц бүрдүүлэх хөтөлбөр нэрээр 2021 оны 1-р сард 11 тэрбум төгрөгийн зээл авчээ. Тус банкууд авсан зээлээ бүрэн төлж барагдуулаагүй байсан бол хөгжлийн банкны зээлийн мэдээллийг олон нийтэд ил тод гарган мэдээлсний үр дүнд өрийн үлдэгдэл, хүү, алданги торгуулиа бүрэн барагдуулжээ.
Гэвч одоо арилжааны банкууд дотроо хамгийн өндөр дүнгээр зээл авсан ч дампуурсан Капитал банкны өрийн үлдэгдлийг хэрхэх вэ? гэдэг асуудал асуулт хэвээр байна. Капитал ХХК нь хөгжлийн банкнаас нийт 59.6 тэрбум төгрөгийн зээлийг 5.7 жилийн хугацаатай авч байсан. Гэвч зээл авснаас хойш 4.5 жилийн хугацаанд ердөө 7.7 тэрбум төгрөгийг эргэн төлж 51.9 тэрбум төгрөгийн өрийн үлдэгдэлтэй дампуурчихсан юм.
Тус банк үндсэн зээлээ төлөлгүй 1646 хоног хэтэрсэн бол хүүгийн төлөлт 1222 хоногоор хэтэрчээ. Одоогоор тус банкны харилцах дансны 1.7 тэрбум төгрөгийн төлбөрт 6 ширхэг үл хөдлөх хөрөнгө 1 газар эзэмших эрхийг хөгжлийн банкны өмчлөлд шилжүүлэх авахаар ажиллаж байгаа бол 53.7 сая төгрөг нэмж төлүүлээд байна. Харин үлдсэн 50 орчим тэрбум төгрөгийг хэрхэн барагдуулах нь тодорхой бус байгаа юм.
Сэтгэгдэл (0)
Сэтгэгдэл бичигдээгүй байна