17 га газрыг нийтийн эдэлбэрт бүртгэснээр нийтийн эзэмшлийнх болов

НИТХ-ын ээлжит бус VI хуралдаан өчигдөр боллоо. Хурлаар нийтийн эдэлбэр газрын байршил, хэмжээг тогтоох тухай Нийслэлийн Газар зохион байгуулалтын албаны дарга Г.Батзориг танилцуулав.

Тэрбээр “Улаанбаатарын хүн ам өсөх хэрээр барилгажилт, нягтрал өдрөөс өдөрт нэмэгдсэн. Нийслэлд нийтийн эзэмшлийн гудамж талбай, ногоон байгууламж, амралт зугаалгын талбай нэмэгдүүлэх шаардлага тулгарсан.

Өмнөх жилүүдэд нийтийн эдэлбэр газарт хамааруулж болохуйц байршил, бусдын эзэмшилд ороогүй цэцэрлэгт хүрээлэн, хүүхдийн талбай, ногоон байгууламж бүхий 108 байршлын 208.3 га газрыг НИТХ-ын дөрвөн удаагийн хурлаар нийтийн эдэлбэрт бүртгэсэн. Энэ жил нийслэлийн зургаан дүүргийн 25 байршилд 17 га газрыг нийтийн эдэлбэрт бүртгэхээр төлөвлөв.Эдгээрийн 16-д тохижуулна Үлдсэн есөд өмнө нь тохижилт хийсэн” хэмээлээ. Тодруулбал,

Баянгол дүүрэгт дөрвөн байршил бүхий 0.52 га, Баянзүрх дүүрэгт зургаан байршил бүхий 13.95 га, Сонгинохайрхан дүүрэгт гурван байршил бүхий 0.59 га, Сүхбаатар дүүрэгт таван байршилд 0.65 га, Багануур дүүрэгт таван байршилд 0.84 га, Налайхад хоёр байршил бүхий 0.49 га газрыг нийтийн эдэлбэрт бүртгэх юм.

Тогтоолын төслийг хэлэлцэж, төлөөлөгчдийн олонх нь дэмжсэнээр дээрх газруудыг нийтийн эдэлбэрт бүртгэв гэж Нийслэлийн сургалт, судалгаа, олон нийттэй харилцах газраас мэдээлэв.