"Үг хэлүүлэхгүй байна" гэх шалтгаанаар С.Эрдэнийн биед халдсан гэж мэдүүлжээ

Өчигдөр “Соёлын төв өргөө”-нд Ардчилсан намын 14 дүгээр  Их хурал болох үеэр намын дарга С.Эрдэнийн биед халдсан хэрэг гарсан.  Тодруулбал "Зэс Эрдэнийн хувь" компанийн Д.Алтанхуяг  тайз руу гарч  С.Эрдэнийг түлхэн унагаж, бие, эрх чөлөөнд нь халдсан хэргийг цагдаагийн байгууллага шалгаж байгаа юм. Тэгвэл Сүхбаатар дүүргийн цагдаагийн хэлтэст саатуулагдан шалгагдаж байгаа Д.Алтанхуяг мэдүүлэг өгөхдөө "Үг хэлүүлэхгүй байна гэж уурласан" гэх шалтгаанаар С.Эрдэнийн биед халдсан гэж мэдүүлжээ. 

Харин түүнд зодуулсан С.Эрдэнэ шүүх эмнэлэгт үзүүлж, цагдаад гомдол гаргасан бөгөөд дүгнэлт гарсан хойно ямар зүйл ангиар зүйлчлэгдэн яллагдах нь тодорхой болно гэж С.Эрдэнийн өмгөөлөгч мэдээллээ. 

Одоогоор Д.Алтанхуягийг  Эрүүгийн хуулийн 10.1-2 дахь хэсэгт заасан өс хонзон, хувийн тааламжгүй харилцааны улмаас бусдын амь насыг хөнөөхөөр завдах гэсэн гэмт хэргийн төрөлд хамааруулан шалгаж байна.