Дорнод аймагт байрлалтай Зэвсэгт хүчний 327-р ангид жил дараалан цэрэг нас барж байна. Өнгөрсөн 2021 онд ногооны талбайд ажиллаж байсан цэрэг биеийн байдал нь гэнэт муудаж, эмнэлэгт хүргэгдсэн ч амиа алдаж байсан. Харин 2022 оны 8-р сарын 5-ны өдөр буюу өнгөрсөн баасан гарагт 21 настай цэрэг голын усанд живж амиа алдаад байна. Жил дараалан нас барсан хоёр алба хаагчаас гадна 2019-онд хадлан бэлтгэж байсан цэрэг машинд дайруулж амиа алдсан удаатай.
Тэгвэл тус ангийн захирагч, хурандаа Н. Цэцэнхүү хугацаат цэргийн алба хаагч нарыг хувийн компанид өдрийн 50 мянган төгрөгөөр ажиллуулж цалинг нь хувьдаа завшдаг хэмжээн эх сурвалж бидэнд мэдээллээ.
Жишээлбэл: СИБО ХХК гэх газар тариалангийн компани, Евро хашаа ХХК гэх блокны үйлдвэр, тоосгоны үйлдвэр зэрэг томоохон компаниудад ажиллуулж цэргийн цалинг хувьдаа завшдаг гэсэн юм. Үүгээр зогсохгүй уяач, мянгат малчид зэрэг мөнгөтэй нөлөө бүхий хүмүүсийн ажлыг цэргүүдээр хийлгэдэг гэх мэдээлэл байна. Дээр нь нэмээд ноос ноолуурын үед болон хадлан дээр ажиллуулж мөн л цалинг нь завшдаг гэлээ.
Үүнийг нотлох мэт манай сайтад ирсэн мэдээллээр 2021 онд тус ангийн ахлагчийг 1 сарын хугацаанд өдрийн 40 мянган төгрөгөөр хэмээн ажиллуулаад 1,2 сая төгрөгийн цалин олгох байснаас ердөө 400 мянган төгрөг олгожээ. Мөн бусад алба хаагч нартаа 5 хоногийн чөлөө олгож хадлан дээр ажиллуулсан гэсэн юм.
Харин түүний шууд удирдлагад хамааралтай доод албан тушаалтан болох Штабын дарга н.Амарсанаа ажлын байран дээрээ байх дийлэнх цагаа согтуу өнгөрүүлдэг гэнэ. Цэргүүдийг барлаг мэт ажиллуулж цалинг нь авдаг асуудалд ч энэ хүн холбоотойг эх сурвалж онцлоод байна. Мөн дэд хурандаа н.Ангар гэх хүн хүнсний дэлгүүр хувьдаа ажиллуулдаг. Улмаар цэргүүд болон ээлжийн бүрэлдэхүүнээрээ гурил бэлдүүлж, хэрчүүлж дэлгүүртээ аваачин зардаг, штабын даргатайгаа нийлээд ажил дээрээ архи уудаг гээд ангиа гэх сэтгэлгүй армийн дарга нар дураараа дургиж байгаа асуудлуудыг эх сурвалжууд бидэнд хэлж байна.
Цэргийн ангиуд хугацаат цэргүүдийг боол мэт зарж, захирагч нар нь цалинг нь авч халаасаа зузаалдаг энэ байдлыг ЗХЖШ анхаарах хэрэгтэй. Армид алба хаахаар очсон ид залуу насны эрчүүд барлаг хийж, согтуу дарга нарынхаа гарын үзүүрт зарагдаад зогсохгүй гарын чилээг нь гаргаж явсаар эцэс сүүлд нь эрүүл мэнд, эрдэнэт амиараа хохирсоор байна.
Сэтгэгдэл (0)
Сэтгэгдэл бичигдээгүй байна