БШУЯ: Аравдугаар сарын 1 гэхэд нэг ч хүүхэд цоожтой хаалганы цаана үлдэхгүй

Нийслэлийн цэцэрлэгийн элсэлт, бүртгэлийг энэ сарын 10-ны өдрөөс эхлэн "E-Mongolia" цахим системээр зохион байгуулж байна. Өчигдрийн байдлаар нийслэлд цэцэрлэгийн насны нийт 73,818 хүүхдийн бүртгэл амжилттай хийгджээ. Бүртгэл энэ сарын 24-ний өдөр хүртэл үргэлжлэх бөгөөд "Е-Mongolia" цахим систем ачаалалгүй, хэвийн ажиллаж байна.

Цэцэрлэгийн хүртээмжийн талаар БШУ-ны сайд Л.Энх-Амгалангаас тодруулахад тэрбээр "Энэ жил 80 орчим сургууль, цэцэрлэг шинээр ашиглалтад орно. Цэцэрлэггүй дүүрэг, хороод байхгүй болж байгаа. Өнөөдрийн байдлаар Сүхбаатар дүүргийн нэг ч хүүхэд цэцэрлэгийн гадна үлдэхгүй. Чингэлтэй дүүрэг, Багануур, Багахангай дүүргүүдийн хүүхдүүүд мөн адил 100 хувь цэцэрлэгт хамрагдана. Харин Хан-Уул, Сонгинохайрхан, Баянзүрх дүүргүүдэд цэцэрлэгийн хүртээмжийг нэмэгдүүлэхээр ажиллаж байна. Есдүгээр сарын 1-нд амжихгүй гэхэд аравдугаар сар 1-нээс өмнө гэхэд нэг ч хүүхдийг цэцэрлэгийн гадна буюу цоожтой хаалганы цаана үлдээхгүй" гэв.