М.Бадарчийн барилдах эрхийг дөрвөн жилээр хассан шийдвэрийг хэвээр үлдээлээ

Өнгөрсөн жилийн баяр наадмын Хүчит бөхийн барилдаанд улсын гарди М.Бадарч түрүүлж, улсын арслан цол хүртсэн. Гэвч түүний сорьцоос метенолон гэх бүх цаг үед хориотой допингийн төрлийн бодис илэрсэн тул тэрээр В сорьцоо шинжлүүлэх хүсэлт өгч, өөрийн биеэр хяналт тавихаар БНСУ явсан билээ. Улмаар шинжилгээний В сорьцын хариу албан ёсоор гарч, допинг хэрэглэсэн нь баталгаажсан юм.

Тэгвэл өнөөдөр /2024.05.10/ Монголын Олон Улсын ба Үндэсний Спортын Арбитраас улсын арслан М.Бадарчтай холбоотой допингийн маргааны шийдвэрийг танилцуулав. Энэ үеэр М.Бадарчид эм өгсөн гэх гэрч гарч ирээд тайлбар, мэдээлэл өгөв. Тухайн гэрчийн ярьж байгаагаар, "Турк улсаас биеийн эрч хүч сэргээх, метанолин бодис орсон 50 ширхэг эмийг өдрийн 2-оор дөрвөн таблетка ууж хэрэглэсэн. Энэ хугацаандаа бэлтгэлийн явцад панангинтэй андуурч, М.Бадарчид өгсөн байж болзошгүй хэмээн ярилаа.

Үүний араас М.Бадарч өгсөн мэдээлэлдээ тэрбээр "Би гэрээсээ бэлтгэл рүүгээ явахдаа замаараа эмийн сан орохоо мартаад шууд бэлтгэл дээрээ очсон.Панангин байна уу гэхэд “Байна” гэсэн.
Хэдийг өгөөч гэсэн өгсөн.Түүнийг нь л хэрэглэсэн. Бэлтгэл дээр очихдоо панангин гэж бодоод бүгдийг нь уусан. Тавдугаар сарын нэлээд сүүл байсан, наадамд гарах бэлтгэл дөхсөн байсан. Өдөрт 2-3 удаа панангин уух заавартай байсан. Зургадугаар сар дөхсөн байсан" гэлээ. Гэрч үнэн юм ярих болоод л өөрөө гарч ирсэн байх.  Би гэрч авчраагүй шүү" гэлээ.

 Гэвч гэрчийн мэдүүлэг нотлогдоогүй тул М.Бадарчийн барилдах эрхийг 4 жил хасах шийдвэрийг хэвээр үлдээлээ.